Samstag, 22. November 2025

Samstignami, z beste Wätter und z Dame 2 trifft sich churz vor de drü ir Halle vom Grentschel. Chlei nervös vorem bevorstehende Match gege Lützeflüh, wo Punktglich stöh, düemer üs füre Match vorbereite.
Üsi Gägnerinne trudle langsam ih und die eint oder angere Gsichter wie ou Gschichte chöme üs no vom letste Jahr ih Sinn.
Punkt 4ii starte mir mit üsem Match. Ohni grossi Faxe chöi mir mit üsne Service Ahspil eh suveräne Punktevorsprung vo afang ah festhalte. Z Spil louft üs wie gschmiert, ou wenn eidütig no chlei Luft nach obe het. So chöi mir nach 21 Minute dr erst Satzgwinn mit 25:13 ungerstriche.

Im zwöite Satz sie eidütig ou üsi Gägnerinne im Spil ahcho. Mit dütlich meh druck fordere si üs, üses beste Spil vom abe z zeige – was üs ou datsächlich glingt. So chöimer ou dr zwöit Satz mit 25:17 für üs schribe.

Da mir ir letste Saison ou scho mit zwöi Sätz vorspung verlore hei, heimer vo ahfang ah üses Spil wöue dürezie und nüt la ahbrönne. Zäg Zäg heimer mit gezielte Ahspil und relativ guete Ahgriffe ou dr dritt Satz klar chönne verteidige. Ou wenn mer am Schluss plötzlich no müeh hei gha mit de Abnahme, heimer bim Punktestang vo 25:12 dr Sack zue da - ou ohni z heilige Poulet gfunge z ha.

Mit viu fröid heimer so sogar eh Stung früecher als planet üses wohlverdiente Znacht im Schwane chönne ga gniesse – daher «Ente gut, alles gut».


Autor: Nr. 11