Samstag, 24. Oktober 2026

Am verrägnete Samstig heimer üs id haue trout, zum üses zwöite Spiu vor Saison ahztrette.
Nach dem de ouno die letzte Werbebanner fiin süberlich, horizontal perfekt usgrichtet si worde, hei mir üs as ihwerme gmacht. Ih üsne nigu nagu nöie Shirts, si mir parat gsi für z Spiu.

Dr erst Satz isch üs wie meistens rächt guet glunge. Ah dere Steu nomau gueti Besserig ah d Spielerin vom Gegnerteam, wo scho im erste Satz wägä äm nä zämmestos het vom Fäud müesse.
Nach dr churze Ungerbrächig heimer üses Spiu chönne witerzieh und dr erst Satz vor Saison für üs gwinne.

… leider isches ner aber ou bi dem einte Satz blibe…

Füre zwöit Satz heimer üs viu vorgnoh. Am Afang heimer no meh oder weniger chönne mithaute uh ner si üsi Gegnerinne dervo zoge. Mir hei üs klar müesse gschlage gä.

Im dritte Satz simer mit de Gedanke no irgendnöime gsi… Womer plötzlich 13 zu 3 hinger si gsi, het üs dr Ergiz doch wieder packt uh mir hei eh starchi Ufholjagd gstartet. Mir hei üs bim ne Punktestang vo 16 zu 19 wieder chönne zeige. Es isch de ner glich schnäu fiirabe gsi uh mir hei dä Satz müesse üsne Gägnerinne überlah.

Ou im dritte Satz hei mir es grosses uf und ab gha. Es het eifach überau nid viu, aber eh chlei öppis gfäut.
So hei mir üs nach vier Sätz gfrustet müesse gschlage gä.

Ungerem Strich hei mir ah dem Abe dennoch zwöi mal gege üsi Gegnerinne gwunne und einisch verlore: mir hei im Hirsche d Pizza schneller bercho und si ou im Zahle massiv zügiger ungerwägst gsi ;)… dennoch hets leider kenni Pünkt gäh für üs ah dem Abe. Mir löh aber dr Kopf nid la hange uh fröie üs scho ufe nächst Match am Mäntigabe.

No es grosses MERCI ah auii, wo üs ah dem Heimmatch so zaurich vom Zueschouerbänkli ungerstütz hei!


Autor: Nr. 11