Donnerstag, 12. November 2026

Mir möchte öich hüt gärn die Charaktere vorsteue, wo zuesätzlech zu üs Spielerinne jewils mit a üsi Matches chöme und üses Spiu uf ungerschiedlechi Art düe beiflusse:
Mir hei da einersits d Motivation Flippa. Sie zeigt sich bsunger usgeprägt und sprützig, we mir ä Louf hei und ei Punkt nachem angere mache. Denn gumpe üsi Blöck mindistens ä halbe Meter höcher id Luft aus ä Delfin usem Wasser. Die het sech a däm Match leider nid so dominant zeigt, wie sie das süsch oft macht.
Witer isch o d Mo, dr Fruscht, mängisch i üsem Team vorhande, we mir ä Fähler mache, när no grad ä zwöite und ä dritte. D Mo het sech i däm Match definitiv wohler gfüuht aus d Flippa und het üs ihre Charakter oft zeigt. Me chönnt fasch säge, sie het ihri Ellböge so fescht usgfahre, dass d Flippa, üsi Motivation, trotz viune "Hopp Lyss"- und "Chömet, dä hei mer wieder"-Versüech ke Chance het gha gäge sie.
Gäge d Mo wehre cha sech üses Team aber oft sehr guet dank dr guete, alte Wilma, em Teamgeist. D Wilma isch sit eh und je mit üs drbi - i guete wie o i schlächte Zyte. Mir tüe se pflege und schetze sie sehr!
Und last but not least: üsi Jill, üses Können. Si isch leider no im Teanager-Alter: unbeständig, mängisch usgriift, mängisch no usboufähig. - Luunisch und bi däm Spiu grad bsungers trötzelig!
So het üs d Jill, üses Können, im erschte Satz ghulfe, dass mir üsne Gägnerinne us Steffisburg es Chopf-a-Chopf-Renne glieferet hei. Im zwöite Satz het sich d Jill, üses Können, ganz rebellisch agsgellt. Sie het sech mit dr Mo, üsem Fruscht, verbündet. Und we die beide sich verbünde, denn geits bärgab...
Zum Glück hei Flippa und Wilma (Motivation und Teamgeist) sich im letschte Satz wieder dominanter chönne zeige, so dass d Jill, üses Können, wieder es bitzli us ihrere Teenager-Bockigkeit het chönne usecho.
Achtung wichtig: D Flippa, d Wilma, d No und d Jill si NID üsi Spielerinne (egal ob alt oder jung ;) ), sondern ZUESÄTZLECHI Charaktere, wo üses Spiu beiflusse, obwouh sie nie ä Ball berüehre.
So u de blibt üs iz nume no z hoffe, dass sich Wilma und Flippa, üse Teamgeist und üsi Motivation, im nächste Spiu guet chöi gäge d Mo, üse Fruscht, düresetze und d Jill, üses Können, nid trötzelet, sondern sich vo ihrere usgriifte, beschte Site zeigt.

Autor: Nr. 12