Samstag, 17. Dezember 2022

Mir hei e Match lang chönne -iere...

Zum Abschluss vor Vorrundi hei mir üs in Burgdorf dörfe präsentiere. Derzue hei mir üs müesse am Samschti Abe häre transportiere. Bi dene viele Halle und Garderobe dörfe mir üs nid verliere. Ir richtige Garderobe hei mir üs de für ds Spiu afa präpariere. Leider hei mir üs müesse geduldig präsentiere. Bim Vorgängerspiu hei si nid grad wöue pressiere.

D Haue het dr Architekt mit sehr viu Linie dörfe verziere. Dr Schiri versuecht dr Überblick nid ds verliere. Wos när losgange isch, hei mir üs wöue konzentriere. Und vo Afang a das Spiu kontrolliere. Mit starke Service und Angriff hei mir chönne dominiere. Ir Verteidigung het Burgdorf viel Bäll müesse verliere. Nach grossem Vorsprung hei mir dr Larifari i üses Spiu la integriere. Zum Glück het bimne Satzbau dr Gägner e Fähler gmacht bim serviere.

Dr Larifari hei mit im zwöite Satz nid chönne eliminiere. Mir hei üs gäge Tabellen-Letscht la blamiere. Ir Satzmitti hei mir de agfange ä Ufholjagd ds lanciere. Gäge Schluss hei mir de wieder üsi Närve la krepiere. Und Burgdorf het übere Satzgwinn chönne triumphiere.

Mir hei üs när im dritte wieder chönne motiviere. Hei nach gwunnene Pünkt e Freudeschrei la intoniere. Druckvolli Angriff hei mir chönne i ihres Fäud betoniere. So hei mir mit Iisatz dr Satzgwinn la arrangiere.

Im vierte Satz hei mir witerhin d Angriffsmaschine la schmiere. Am Gägner sini Bäu hei mir am Netz chönne blockiere. Leider hei mir d Konstanz la reduziere. Burgdorf het no chlei ufghout aber het am Schluss müesse resigniere.

Nach däm Sieg wei mir d Saisonhalbzyt bilanziere:

- Mir si es usglichnigs Team, wo keine duet dominiere.
- Dank gnüegend Spieler cha me ou mau e Satz oder es Spiu pousiere.
- Bi Koordinationsleitere und "Bring Sally up" tüe immer die gliiche reklamiere.
- Bi de Spiel zum Trainingsschluss cha ou mau es Quatschen passiere.
- Merci Roger, dass du üs trotz kaputtem Chöi aus Coach tuesch dirigiere!
- Merci Aaron, dass ou Sprungservice und spezielli Angriffe tuesch probiere!
- Merci Chrigu P., dass immer viu tuesch parliere!
- Merci Chrigu W., dass du üs mit stabile Päss tuesch stabilisiere und dr Gägner mit links tuesch bombadiere!
- Merci Colin, dass du dis Spiu uf emne höchere Niveau hesch chönne etabliere!
- Merci Gere, dass du tuesch ds Team organisiere und am Gägner sini Verteidigung tuesch frustriere!
- Merci Jan, dass hoffentlich wieder zrügg chunsch nachdäm du in Dütschland tuesch studiere!
- Merci Jules, dass du so schnell üses Spiel und System hesch chönne antizipiere!
- Merci Kim, dass trotz Meisterschaftsverzicht mit Qualität im Training tuesch partizipiere!
- Merci Mäthi, dass du so schnäu ir Verteidigung tuesch reagiere und schön chasch passiere!
- Merci Mattia, dass du d Angriffe tuesch blockiere!
- Merci Mike, dass du chräftig tuesch attackiere!
- Merci Natanael, dass du di so guet und rasch hesch chönne integriere!
- Merci Trisu, dass du flink tuesch agiere und mit variablem Spiu d Angrifer chasch inszeniere!

Mir tüe jetzt mit em Training pousiere. Tüet über d Feschttäg guet diniere, und d Muskle la regeneriere. De chöi mir im nöie Jahr üses Spiu im Training optimiere und ir Meisterschaft wieder voll attackiere!


Autor: Dä wo ds Nr. 3 tuet präsentiere