Dienstag, 14. Februar 2023

Vor, Während und nach emne Spiu gö eim immer wahnsinnig viu Gedanke düre Chopf. Ig gibe euch mau e chliine Iiblick i mini Gedanke. Vermuetlich hani zwar aui Tasse im Schrank, aber ev. nid aui Hänkle i die gliichi Richtig...


mau luege, wär sich aues itreit het für e Match... shit, es isch nume ei Mitti derbi... de mues äuä ig wieder mau gumpe wie e Löu... ha früecher ja viu gspiut ir Mitti, aber mani no ufe bi de Blöck... hätt doch chli weniger ungsunds söue frässe ir letschte Zyt... oder chlei meh Usduursport? Ev. mit em Velo ga schaffe... jetz isches ja eh ds spät und ig ds schwär für Mittelblocker... chönnt ev. süsch öpper Mitti spile?... ach du heilige Chürbis, dr Gägner isch ja no VOPAP!... lege de emu sicher no so elastischi Stütze für d Chnöi a... de gseh ig de us wie über 45gi... ups, bi ja scho 47gi... eigentlich bini scho fangs ä aute Sack...

Oh, dr Trisu und d Lea hei ja scho fasch aues ufgsteut... cooli Sach, de hei mir sicher gnue Zyt zum ufwärme... oder wärde mir de scho fasch wieder müed bi zviu Ufwärme?... mir si ja erfahre gnue, höre de eifach uf wenn mir warm si... lueg einisch, d Core isch Schiri... die pfifft eigentlich immer souverän, das wird super... gliich mau e doofe Spruch la fahre, die mah das verlide...

zum Glück chani im ershte Satz hinge afah, de chani mi über Defense i Mitti-Job ine kämpfe... haha die junge Gägner houe ja fasch jede Service i ds Netz... si äuä chlei überheblech mit ihrne Sprungservice ire ungwohnte Haue... ach kacke, jetz hätt ig äuä konsequenter a d Linie use söue ga verteidige... ds nächscht mau hani ne, dr Line Angriff... wieso schlaht jetz dä Pinsel diagonal?... het äch dä VOPAP'ler sini Haar absichtlech so gfärbt?... immerhin hett är no Haar... sie si ja scho rächt stark, aber mir möge mithäbe - so geil!... wuhuuuu, jetz chumi füre a ds Netz... verdammt mues me da viu hin und här seckle im Block... gib mir doch mau e Pass i d Mitti du cheibe Passeur!... YESS, dä mit em links am Block verbi abdräie funktioniert no... dä Soucheib schlaht ja extrem höch obe, da mani im Block ja nie ufe... oh manno, het nid glängt und mir hei 22:25 verlore.

die Zwätschgä vore Trainerin dört gärn ou mau dr jünger Passeur la spile... und dä Zwätschgärich dört ou mau e Service chlei weniger stark bringe... chumm, hou mau eine hinger use... nid scho wieder, du bisch e Möff... Merci Roger für ds Timeout, de wird dr Servierer-Typ viellich nervös... oh, es het no vo dene Fizzers... cha gloub scho zwöi Fizzers främslä im Timeout... wenn ig de Blähungen überchume, chani de unuffällig "Dampf" ablah... hey, aber 0:11 isch scho grad chlei deftig... ändlech üse erscht Punkt, jetz müesse mir so witerfahre... HEEEYY, die Ussespiler stöh viu ds wyt hinge, dört sött ig häre... egau, die vo Papiermühli mache ja eh kei Finte und ig stah haut chlei diagonaler... krass, hole mir jetz würklech no uf?... NEEIIIIN, was isch mit em Colin passiert?... das gseht gar nid guet us... hoffentlech nid ds Chrüzband... är häbt sich uf dr Site, isch es äch es Siteband? oder Meniskus?... sofort d Sanitätstäsche hole, jetz mues ig seckle... dä arm Cheib isch soublöd uf em Bei glandet... d Lea isch ja fasch fertig mit em Physio-Studium, ev. cha si ja häufe... wie loufts äch jetz mit em Spiel wyter?... aus Schiri wäri brutau näbe de Schueh, aber d Core macht das souverän... dä Satz hätte mir gärn für e Colin gwunne, aber es het nid glängt mit dr Ufholjagd - 19;25

Ändlech bringe si dr jünger Passeur, wo üs ir Vorrundi e Satzgwinn het ermüglecht... jetz aber Finger use näh und Vougas... geit ja, mir hei se meh oder weniger im Griff... Wohoooo, was isch de das für ne Verteidigung gsi... ha dä Agriff gar nid gseh cho, bi aber zum Glück am richtige Ort gstande... wieso mues die scheiss Lampe usgrächnet ir Flugbahn vo mire geile Annahme stah?... die junge Schnöösle si trotz Nr.2-Passeur immer no ds guet... so jetz aber e Service Serie, wenn die Vopapischte scho 23 Pünkt hei... Nei, nei, nei, was bini für ne Hornochs, dass ig dä Service verschlah... jetz isches äuä gloffe... no chlei Pünkt ufhole und wär weiss?... immerhin wott Papiermühli no chlei künschtle, das geit wie immer i d Hose... isch zwar noch chlei viu ufdshole aber mau luege was dinne ligt... Schade, jetz hei sis glich no hei ta mit 21:25

Ah, jetz isch die erschti Diagnose vom Colin cho... Fraktur vom Tibiaplateau, wiu bir Landig dr Femur uf Tibia drückt het... Waaasss?? Säg doch däm Züg Unterschenkel, Oberschenkel oder Scheiche vom Schenker!... Auso irgend sone Chnoche broche im Chnöi... Hoffentlich nid ou no irgend es Band verschrisse oder dr Meniskus versiechet...

Autor: #3