Dienstag, 20. Dezember 2022

Bim letschtä Herrä Bricht het üse Schül usem Oschte müeh gha mit em Bärndütsch. Är chunnt urspüngläch vo Wiu/Sanggaue (Mir ds Bärn bruche dr "L" haut nume im Oberland oder bi französische Wörter -> Schül statt Schüeu). Drum verwirre mir dä Bursch no grad einisch.

A däm vorwiehnachtleche Zischti Abe hets üs uf Etzikä verschlage. Inerä tüpische Mehrzwäckhaue uf em Land hei Schueu Goofe rächtzytig no Stüeu vom Abschlusstheater wäg gruumt und üsi Gägner hei ds Netz chönne häre pflanzä. Wo mir üsi Musklä hei afa schüttle und die erschte Bäu hei tätscht, merkä mir dass Etzikä nume zwöi Buebe hei ufbotte. Dr eint Jüngling isch de bim Start ou no grad uf Bänkli ghöcklet. Mir hei aber de grad umgehend gmerkt wiso: ihri Frölein hei ordentlech Pfupf im Füdli und deftig uf d Bäu brätschet. Mir si grad chlei usicher worde und üsi Verteidigung het gwagglet. Ds het zu waggligä Päss und unsicherä Angriff gfüert. Die frächä Solodurner heis natürlech usgnützt und grad wieder zrügg pfäfferet. Obschon mir üsi Sterchine ou hei probiert inä ds bringe het me guet gmerkt, dass mir Zwöite vo de dritt Platzierte gforderet wärde. Dr Satz isch sehr usgliche gsi und d Turner us Etzikä hei mit liechtem Vorsprung sogar Satzpünkt usegspiut. Mir hei üs aber mit mentaler Leischtig (si im positive Sinn Psüchos!) no ufghot und dä Satz iitütet.

Das knappe Satz Verlüüre isch für d Etziker äuä chlei ä Chlapf zum Gring gsi. Jetz si sie wie verschüpfti Hüener uf em Fäud gstange und hei afah Fähler mache. Vo üsere Site si immer meh Angriff uf e Bode tätscht und ou mit Fintä hei mir sie chönne plaage. Potztuusig isch das jetz ringer gange und mir hei ou dr zwöt Satz chönne gwinne.

Im Dritte isch es de am Afang ganz leid gloffe für Etzikä. Dür e Aspiu Serie hei sie immer meh ihre Muet verlore und si mit 0:12 i Rückstang grate. Wenn de mau e Verteidigung glunge isch, hei mir i üsem Agriff grad no einisch uf die arme Cheibe ii prüglet. Mängisch isch es eim vor cho, wie es schleglä mit em Bau. Ou dä Satz hei mir üs gschnappet und hätte no Luscht uf mehr Volleybau gha. D Etziker hei de ou no ghufe e Vierte spile und dr arm Kärli am Zäurahme het ou mitgmacht. Ohni Positione hei jetz ou Agrifer chönne ds Spiu gstaute und d Passöre dörfe brätsche. Eigentlich hei mir das Spiu ja när 4:0 gwunne, ou wenn nume 3 Sätz zeue.

Leider hets üsem Felix no eis i Scheiche tätsch... äuä öppis mit em Musku. Mir wünsche dir ganz gueti Besserig! D Turner die luschtige Gseue, hei när no mit ihrne Fäns gfeschtet bi Bier und Raider (das Züg heisst ja gloub jetz Twix?).

Ds Mixed Team wünscht aune schöni Feschttäg und üsi Gägner söue sich für d Rückrundi deftig ihri Ränze vou schlah!

Autor: dä wo briegget wöu är ds Drüü nid darf ha