Montag, 09. Januar 2023

Obschon mir doch ersch grad letscht Friti hei in Messen gspiut, het üs dä choge Spiuplan scho grad wider us dr heimelige Stube use zoge. So si mir aui i das Grentschu täselet und hei das blaue Match Tschöpli agleit. Irgendwie isches scho wider Messen gsi, aber es angers Team u das het üs ghörig im Hirni la umestürme. Mir hei du gli gmerkt, dass das angeri Bursche und Mädeli si. Hei doch die ganz uverschämt afa die Bäu abeschwarte! Und wenn mir nid ufpasst hei, isch scho dr zwöit Bau cho überetschudere. Oder besser gseit: wenn dr zwöit Bau het tschuderet hei mir Tötsch nid ufpasst... So sis de hurti ordeli Pünkt gsi, wo die Buechibärger si vore gläge. Leider het üs das so düre Wind bracht, dass mir bis am Schluss kei Chance hei gha - 10:25 stärneföife nonemau!

Mir stouze Güggle hei üs das nid wöue la biete und hei im zwöite Satz besser wöue ufpasse. Jetz het da dä stramm Jüngling plötzlech bim Service afa druf tätsche wie ne Muni. Und mir dumme Esle sie nume erchlüpft, statt üs ds wehre. Klar hei mirs ou mau chlei la sirache, aber haut mängisch ou näbe ds Fäud. Obschon mir die zöite Bäu vo dere Luusmeitä besser hei verwütscht, hets am Schluss doch wieder nid glängt - 21:25 zum Donner!

Hui si mir putzhässig i nächscht Satz. Das isch aber grad chlei übermüetig gsi und mir hei ohni Not es paar Bäu vertublet. Immerhin hei mir üsi Töibi chönne kanalisiere und hei die Bäu i ds Messener Fäud afa wüete. Sie äch die jung Turner chlei erchlüpft? Uf jede Fau hei si afah nervös umeschwaudere und mir si dür das nume säubschtsicherer worde. Mit grosser Erliechterig hei mir üs dä Satz gschnappet - 25:19 tschäddärä bumm!

Volleybau isch haut hüfig ou e mentale Sport für Psychos. Jetz isches guet für üs gloffe und Messen hets chlei la pfüdere. Ds einte het äuä ds angere begünschtigt und mir hei schnäu chönne ä Flädere a Vorsprung usehole. Nach dr Serviceserie vo Messen im Zwöite, hei mir jetz e Serie häre pfäfferet - Rache isch haut Sirup! Ou dä Satz hei mir üs gschnaut und si ab i d Entscheidig - 25:16 und hopp dr Bäse!

Im entscheidende füfte Satz hei mir schnäu mau e chline Vorsprung häre gleit. Messen het jetz vor auem über die beide Brätsch-Buebe Druck gmacht und üs versuecht abe ds tätsche. Mir hei aber ou gemäss üsem Motto "volles Rohr" immer wieder ds Rohr neu glade. Mir heis nümm la schliife und dr Vorsprung isch schön uf üsere Site blibe. So hei mir üs dr knapp Sieg ungere Nagu chönne schriise - 15:11 Stäcketööri isch das Schön!

Nach em Mätsch het ds Liseli no zeigt, dass sie dr Titel vor "Backkönigin" us em letschte Bricht het bestätigt. Si het so ganz feini Muffin Dingens häre zouberet und üs la schnabuliere. Aues guete zum Geburi (Grund für ds bache) du jungs Trübeli!


Autor: Das arme Buebeli, wo ds Drüü immer no nid darf ha